মুখ্য পৃষ্ঠা
06/04/25
14:26
"এই সময় ৰুদ্ধ হওঁক"
এই সময় ৰুদ্ধ হওঁক
অলিখিত ইতিহাস হওঁক ভোকৰ তাড়না
মৃত হওঁক স্বাৰ্থ কিম্বা অৰ্থ
শেতেলীত জ্বলি থকা চাকি গচি
উৰে ৰাতি জ্বলি থাকক উমি উমি |
ৰিহাৰ আঁচলত কলিজা বান্ধি ,
মুধচত ওলমিব নালাগে আই..
মাটিৰ শিল্প গঢ়ি ,
শিল্পতেই দি যোৱা প্ৰাণ |
যদি হয় মৃত্যু শিল্পৰ বুকুত ,
পৰাজয় নহয় তথাপি জীৱনৰ ৰণত |
লতা হৈ বগাই যোৱা দুখৰ গজালি
চকুলো চেলেকি চুই যোৱা শতবাৰ |
প্ৰেম বুকুত লৈ ,
মৌনতাত গাই যোৱা মিলনৰ গান
নাম আহক সন্ধ্যা লুইতৰ বুকুৰে উজাই |
জোনাকীৰ পোহৰত আঁকিম শেৱালীৰ পাহি ,
দুৱৰিত মেলি দিম সপোন
সাৰে থাকিম অনেক ৰাতি
উলটি আহিব সুখ নীলাচল বগাই ,
অষ্টাচলৰ সেন্দুৰীয়া পথেৰে |
______ৰাজু কলিতা
15/01/15
